حاجات غريبه بتحصل على الفيس...
  أكاونت بإسم عبد الحليم حافظ أو محمد عبد الوهاب أو ناس ميته وممكن تلقاه فى الشات وتيجى تكلمه يرد عليك.....سلام قول من رب رحيم ...الطف بعبادك يا كريم. 

 
********************

  والأنقح لما تلاقى أكاونت بإسم إحلق لنفسك أو فكك منى او إبعد حبه تزيد محبه ..يعنى من الآخر ماتضفنيش..أومال عامله ليه الأكاونت؟؟!!
********************

  ولما تلاقى مييييييييييييييييييييت اكاونت لكريم عبد العزيز ومنى زكى وأحمد حلمى ...طب هو الناس دى أنهى فيهم وتبقى هاتعييييييييط فى غرفة الشات ومبيهونش عليهم يردو ا و يا سلام لو أضفت 10 أحمد حلمى وتفتح الشات تلاقى 3 أو 5 موجودين...هو ده الإستوساخ ولا بلاش

** *******************

ولا الجروبات يلهوتييييييييييييييييه...( رابطة محبى أبو الليف) .( رابطة كارهى أبو الليف ) (رابطة مرشحى أبو الليف للرئاسه )..( رابطة محبى جدو ) ( رابطة كارهى جدو )..رابطة مرشحى جدو للرئاسه) ( رابطة محبى خالتى تفيده) ( رابطة كارهى محشى خالتى تفيده) (رابطة مرشحى خالتى تفيده لرئاسة الكونجرس)

*********************

والصفحات ( لو وصلنا لمليون يا جماعه هانخلى البطيخ من غير بزر) ...(لو وصلنا لمليون معجب هانخلى المانجه من غير بزر)... ( لو وصلنا لمليون مش هايطلع حب شباب أخضر للفراوله تانى ) ( لو وصلنا لميون الموز هايبقى من غير قشر)
*********************

لما تلاقى واحد تفلك تفه فى الشات وبيقولك عليا الطلاق ها أوصل الرساله دى لميه من أصحابى...شوفت إنت حلفت ..مراتك هاتتطلق..لازم توصل الرساله يا كده يا ربنا هايولع فيك وفى اللى خلفوك بجاز وسخ إن شاء الله...هه ..ماشى ؟؟!!!
**********************

كل ده كوم ولما تصحى تلاقى رقبتك ملووحه علشان مامتك أخدت المخده من تحتك علشان كيس المخده قيح ونتن ...ده كوم آخر

 

الستر ومليون جنيه

 

 

دعوة أغلبية الشعب المصرى لم تقتصر على الستر فقط كما كان المواطن المصرى من ذى قبل...ولكن ضيف على الستر مليون جنيه ....هذا على سبيل الدفعه الأولى والبقيه تأتى ....لكن لماذا لم تأتى المليون جنيه لما دعو الناس ؟
فى الحقيقه ان المليون جنيه جت فعلا
أه جت فعلا ...مستغربين ليه إنت عايز تقنعنى إن ربنا عز وجل من ساعة ما دعيت لحااااااااااااااااااااد الآن ما إدكش يوميا بتاع20 فى 50 فى 70عد بقى لحد ما تموت هاييجو مليون وأكتر ...شوفت بقى إن دعوتك إستجابت يا باشا .
العيب فيك إنت اللى ما عرفتش تستغل النعمه
بمجرد ان ظهرت الرؤيا وقال المفتى أن غدا اول أيام شهر رمضان المبارك حتى إذا نزلت الشوارع وجدت كل شىء قد تم نسفه بالكامل ولا خضرى معاه خضار ولا فكهانى معاه فاكهه ...وكله كوم والسوبر ماركت كوم تانى ..لا تستطيع الدخول من كثرة الزحام تكالب غريب على كل شىء وكل المنتجات من كل الانواع.. طوابير طويله على شباك الحساب .
كل شىء إتنسف...ونسأل أنفسنا هى الحكومه بتعاملنا كده ليه ...لسبب بسيط قوى ...الحكومه شايفاك رايح جاى مبزر بتشترى احلى لبس.. أشهى أكل.. وأنظف شرب.. وعايش فى أعفن مكان ..طبيعى تفرض عليك ضرايب ...يعنى شايفينك غنى ولا يجوز فى مبدأ الحكومه ان يكون هناك غنى إلا الله .
أما نحن ...فنحن الفقراء إليه .
تذكرون اليوم الذى قررنا ان نقاطع الشراء ونعمل إضراب ...ليكون هذا اليوم ضربة قاضيه ودرسا قاسيا للتجار الفجار الذين يغلون البضائع ويمررون المعيشه ويفقعون المراره...تصوروا ..أحلى مصلحه عملها التجار بسبب هذا اليوم ...تكالب رهييييييييييييييييييب على كل شىء وعلى كل المنتجات وتخزين للطعام الذى قد يكفى عائله لمدة شهرين ...( بيعملو حسابهم لليوم ده )
مش بقول لكم إننا شعب غلبان وطيب ...لزمتها إيه بقى نخزن الأكل ونخليهم يعملو مصلحه من ورانا وهو أصلا اليوم ده تأديب ليهم..طعم وكلناه
أخيرا وليس آخرا تذكرت ومضه بسيطه قد منت علينا الحكومه بها وهى التموين ...( السكر والزيت والرز والكلام ده ...الزيت الاسود بتاع العربيات زيت موبيل أنظف منه ...والسكر اللى مش بيسكر ) أظن كلنا عارفينه ؟!!
وعلى الصعيد الآخر عرفت أن الدعم الحكومى ليس لنا وحدنا ولكن لأثرياء أثرياء مصر زى المالتى ملياردير أحمد عز مثلا ( عرفت مؤخرا أنه يحصل على دعم من الحكومه للطاقة المشغله لمصانعه وشركاته )
السؤال : هل مثل هذا الشخص فقير لدرجة إنه ياخد دعم على الطاقه ...راح لنظيف مثلا بجلبيه مقطعه وإستعطفه وقالله إنه مزنوق فى سلكين كهربا مدعمين علشان يشغل بيهم الورشه بتاعته ....الى متى سنظل أغنياء فى عيون الحكومه و ستظل قططهم السمان فقراء؟؟

الحقيقه وراء ( رامبو )

يدخل وديع و يطل برأسه فقط على تهامى باشا واللذى بدوره قاعد قرفان من نفسه .
وديع : تهامى باشا
تهامى : قصر يا وديع
وديع : المرادى جايبلك أسطوره
تهامى : ياما جاب الغراب لأمه يا وديييييييع
وديع : يا تهامى باشا خلى بالك أطول من كده دنا جايلك أسطووووووووووره ..شاب حارب جيش بحاله
تهامى :جيييش بحاله ؟؟؟!!!
وديع : بحاله....ولوحده .....أقدملك رااااااامبو
( وقبل أن يدخل رامبو ...كان تهامى باشا يقول فى سخريه رامبو؟؟؟ههههههههه وده إقراص ولا حقنه ؟؟؟ هههههههها ها هاهيييييييء )
يتصدم تهامى باشا بدخول شاب تخيييييييين جدا ويقطع ضحكته بدهشه غريبه على وجهه.
تهامى مخاطبا وديع بصوت خافت : إيه الكرش اللى هجم علينا ده يا ودييييييييع .
وديع : ده رامبو يا تهامى باشا .
تهامى معاتبا بشىء من الغيظ المكتوم : هو ده بقى الأسطوره يا ودييييييييع ؟؟؟!!!!
وديع : أييييييييييون يا تهامى باشا .
تهامى : يخربيتك يا وديييييييع ..ده عقبال ما الفيلم يخلص يكون خرب بيتى فى مصاريف الأكل والشرب يا ودييييييع .
وديع : ربنا يخليك لينا يا تهامى باشا .
تهامى باشا مخاطبا رامبو : إسمك إيه يا كابتن ؟؟
يرد رامبو بصوت رفيع جدا ومضحك يشبه صوت فطوطه وبنرفزه : ما قلنا رامبو ..رامبو الجامبو .
تهامى يقول بصوت خافت وبنبره سخريه وتهكم : وماله يا خويا جامبو على جانبو.
تهامى يتحدث لوديع بصوت خافت : هو صوته عامل كده ليه يا وديييييييييع ؟
وديع : صوته راح فى الحرب يا تهامى باشا .
تهامى محدثا رامبو : إنت إسمك إيه أصلا يا رامبو ..
رامبو : إسمى لؤى يا عمو.
تهامى بمنتهى الدهشه ناظرا لوديع وكأنه عايز يديله بالجزمه : لؤى ؟؟؟ وعمو ؟؟؟ وحررت البلاد دى كلها لواحدك إزاى يا لؤى ؟
رامبو : بصحتشى وكفائتشى وسكتشى فى نفسى ..وفى الاول وفى الآخر كله تشوفيق من عند ربنا ...ودعوات مامتشى وخاتشى وعمتشى .
تهامى محدثا وديع : جايبلى واد كاورك يا ودييييييييع وده حرر البلاد دى إزاى بكرشه ده .
وديع : يا باشا ده واد إبن ناس قوى ...وإذا كان على الجسم هانظبطه بالمكياج.
تهامى : مكياااااااااااااج ؟؟!!! وده كله هايروح بالمكياج إزااااى يا وديع إنت هاتشتغلنى؟؟
وديع : يا باشا ده كفااااااائه ...كفائه فى أى خناقه ..إسكت عليه ده لما بيظيط ..اوعى من وش المدفع ..الدم بيبقى للركب.
تهامى : شكلك عايز فيلم كله خناقات ودم يا وديع .. خد ده
( ويطلع تهامى باشا سيناريو إبراهيم الأبيض من درج المكتب )
يمسك وديع السيناريو بإنبهار وينظر لتهامى باشا قائلا : أستااااااااااااذ أستاذ.
ويلتفت لرامبو ويقولله فى إندهاش وغضب إنت لسه هنا يلاااااااا بره .
يعبر رامبو عن إستيائه : بالبكاء والدبدبه على الأرض قائلا : أنا إبن ناس مابحبش حد يزعقلى إهىء إهىء ..مش لاعب مش لاعب والله لأقول لأمى والل لأوريكوا ..والله لأستناكوا بره واخلى وأسلط عليكو العيال تضربكوا بالطوب .إهىء إهىء إهىء عاااااااااا.

*******************
فى السنه اللى رفضنا فيها فيلم رامبو الجزء الرابع
أنتجنا إبراهيم الأبيض...إبراهيم الأبيض إيراداته عملت أكتر من 30 مليون فى أول إسبوع
وإتعرض فى أكتر من 50 دور عرض
إبراهيم الأبيض بيتعرض حاليا على مولتشى أفلام
مولتشى أفلام ...البلطجيه العربى .....أم الأجنبى .

يا خبر باااااااايت

التيته فى الحنتوش إديله ماترحموش..مبدأ من مبادىء وزارة الداخليه .. هذا المبدأ يحتاج منا الى وقفه لا للإعتراض حاشا وماشا ...لكن للتفكير والمخمخه .. كأنك واحد عبيييييييييط لسه مايعرفش حاجه فى أى حاجه ولقى زحمه وناس ملمومه ودم وتقطيع وهيمووووووت ويشوف ما وراى الزحام...لحد ما هداك تفكيره لحيله ...قعد يولول ويعيط ويقول الميت ده يبقى أخويا وسعوووووووولى ...وفعلا وسعولك...وطلع المرحوم حمار ....شكلك إيه قدام الناس ( على رأى المطرب اللى واخدها عافيه هو كمان طارق الشيخ ).
طنش تعش تنتعش..المبدأ رقم إتنين مش من مبادىء وزارة الداخليه بس لاااااااااااا يا بااابا لااااااااااا..ده من جمييييييييع طوائف الشعب إلا اللى عندهم دم بس..وحاشا وماشا برده ..اوعى حد يجيب سيرة الدم علشان جتتى بتتلبش...طب بزمتك والناس والجرايد والأفلام والمسلسلات زورههم إتنبح من الكلام عن السحل فى أقسام البوليس...والتطنيش موت الموضوع.....
مبدأ تالت ..طول ما أنا راجل ليا تاريخى وخدووووووووووم ومظبط الآداء ومرتبتى طريه فوووووق يبقى مش حتة عيل هايدمرلى تاريخى وإنجازاتى ( حتة عيل إتسحل ظلم وإتقطع على مرآى ومسمع من الناس ...حتة عيل رفض..جزء من المبادىء المقدسه للحكومه ) حتة عيل فيه منه كتير مرميين على القهاوى وفى الخرابات ..حتة عيل معروف نهايته مقدما ( إما منتحر على كبرى قصر النيل أو بجرعة مخدرات زايده .....) يا جماعه أنا ما خلانيش أتكلم عن قصة الولد ده غير حاجه واحده ...إنكم إفتكرتونى سلبى وهايف ...بكره لما يروح دمه هدر هاتعرفه مين اللى هايف بكره لما يحاربوكوا بالبرود والأيام تنسيكم ..هاتعرفوا مين اللى هايف وبدمعه ..مهو مش لوحده اللى إتسحل ...أنا مكنتش عايز أكتب ... ولا كان بودى حد يقرالى علشان ...ده موضوع الموسم زى بقية الصحفيين مابيتعاملوا مع القضيه أنا كان أحسنلى أفضل فى هيافتى أحسن ما أستغل دم برىء فى صنع شهره شخصيه ...أدوس عليه فى التراب وأعلى على حسابه ....أنا ليا عم شارك فى 67 و 73 والإستنزاف وعاش ولسه ميت من كام سنه ...مات فقيييييييييييييييييييييير جاهد فى سبيل تحرير وطنه ومات أفقر مما كان طول حياته ...(وحتة عيل لما بيرجع من ستار أكاديمى ما بلاش وجع بطن علشان إحنا اللى عملنا فى نفسنا كده ...خلينا فى موضوعنا )......برده ده إنداس علشان نعلى ..إيه لزمة الوقفه على كورنيش ...منا كل ما يموتلى حد أروح بقى أقف هناك شويه ...وكتر خير الحكومه إنها سايبالى مساحه ووقت أقف على الكورنيش ..أعطل فى العربيات اللى مفيش منهم عربيه كانت سبب فى مقتل الشاب البرىء.... دايما بناخد حلولنا أسوة بالبلاد البارده اللى لا بتحل ولا بتربط ...يا جماعه انا ما انكرش إن موت الشاب خالد سعيد كان خط فاصل بين أيام القهر والإستعباد وأيام الحريه ورفع قانون الطوارىء ...بس للأسف الخط طلع فاصل شحن ...

خالتك أمريكا

وصيتى لأى (شاب نتيت ) متفزلك قاعد فاضى على النت ( زى حلاتى كده برده الوصيه ليا اول واحد ) لازم لما تتكلم أو تختار لون من الأدب (معروف طبعا إن الأدب الوان ) لازم تكون ليك درايه كامله باللى هاتقوله وتكتبه وماتكترش وماتسهبش فى مقالك لأن ماعدش فيه ناس بتستفيض فى القرآءة زى الأول كله إنصرف لمشاهدة الدش أو سماع الجزيره أو البرامج الإجتماعيه ( العاشره مساءا ) أو ( 90 دقيقه ) أو ( القاهره اليوم ) أو ( البيت بيتك ) فلازم تحرص على إنك تكون خفيف الدم ودارى باللى بتقوله ...أنا مثلا بكتب قصص قصيره ..والقصه القصيره هى صراع فى زمن فيه أشخاص مقسمين بين الخير والشر وفيه عقده ...وفيه حل ..والمقال الساخر شىء تانى بيتناول موضوع عن أزمه فى البلد بتعاجلها بشكل ساخر أو بتتناولها بس ...مابتعالجهاش ..ولازم يكون ساخر جدا ....ليييييييييه....علشان طبيعة الشعب المصرى لو إستسلم للهم ..هايموت ..مفيش وسيله لإلهائه أفضل من الضحك..محسوبك بقى خلط مابين المقال والقصه القصيره ...وحكيت موقف بيتناول مشاكلنا ....زى مشكلة الحيوانات النافقه اللى مابتتاكلش وبيأكلوهالنا دى فى مقال المنطلون لأ..ومشكلة الكليبات فى مقال سوكا بازوكا ...ومشكلة المواصلات فى قلة زوق ..ومشكلة تضييع اللغه العربيه فى السحلبيسا ..ومشكلة الكدب فى لو بطلنا نكدب ومشكلة النفسنه فى بتهاك فى أفكارى ومشكلة السرقه فى سيد ماسوره ...وكل دى توبيكات مضحكه هاتلاقوها فى جروبى (وان مازن شوو) على إسم عطر وان مان شو http://www.facebook.com/group.php?gid=220757845390&v=app_2373072738&ref=mf
بالنسبه لموضوع تكوين القصه القصيره ...والنهايه ...إما إنها بتكون نهايه مآساويه او نهايه سعيده أو نهايه معلقه أو نهايتين لإحتمالين ..ولو راجعت تاريخ السينيما الأمريكيه هاتلاقى إن فيه نهايه خامسه طلعوها نهايه عادله ( بس من وجهة نظرهم ) بمعنى أنا لو لص تعبت وكافحت وعرقت وخططت إنى أسرق بنك .....أو تو ماااااااتيك كده ربنا لازم يوفقنى وأسرقه..لأ وكمان أطلع منها زى الشعره من العجين ...لأن بمنتهى البساطه لكل مجتهد نصيب...والأعمال بالنيات وزى ماقال محمد نجم فى مسرحية دول عصابه يابا ( مش ممكن نتمسك ...وده ليييييه ؟؟..علشان هنا أبيض وبتاع ربنا ) طب وهو ربنا يرضى بإنك تسرق فلوس مش بتاعتك وماشقتش فيها ؟؟؟!! ...المجتمع الأمريكى دلوقتى العالم كله بينحنيله وبيشهدله بالرياده فى كللللل شىء ..إلا الفضيله ..والجندى الأمريكى فى كل مكان معروف إنه شاذ وبلبانه ..فمش ممكن يحاربك وجها لوجه ..يقزف من طياره على العزل والأبرياء ماشى ...يرمى من على بعد بالنووى مفيش مشاكل ..لكن مايقدرش يبص فى عنيك ..( علشان بيتكسف ههه) طبعا علشان قوة لا إله إلا الله اللى عمالين بنهلكها ونموتها جوانا يوم بعد يوم... هاتخوفه ويقول بليز هيلب مى مامى.... زمان عبرو قناة السويس و جابو خط برليف الأرض..وحرروا سينا وفعوا العلم دلوقتى شبابنا عبروا قنات ميلودى وجابو خط فودافون علشان الماسيدجات الهديه ..وحرروا نفسهم من الهدوم ...ورفعوا راية الإستسلام ..وسلام يا بلد الكلام .