x
- الإتيكيت أو الزوق زى ما بيسموه وبيسممو بدننا بيه يفتقده كثير من الشعب المصرى ومفهومه عند الباقى غير مكتمل أو مشوه ..
- بس الغلطه مش غلطة اللى ما بيتعاملش بالإتيكيت غلطة اللى بيعامله ....أيون ...غلطة اللى بيعامله .
- ماينفعش أروح لواد سواق من أبو أتاته واخد 6 غرز فى نافوخه وبيكذب يقول قمت مره واحده خبطت فى دلفة النيش( نيش إيه يا أبو نيش ) .وأروح وأقوله لو سمحت بليز خدنى وسط البلد .
- أولا بليز مش هايفهمها خالص وخدنى هايخادها لجوه ..وماينفعش بردك تقعد فى وسط فلاحين وناس كبار فى البلد وتقول دودى جاب هاى ماركز والمدرسه بتاعته فى الكلاس فيرى براود بيه ( جب نمر عاليه ومدرسته فخوره بيه ) لأ قول الواد المقشف النتن عبد الله طالع واد دوؤروم ونجح فى الميديل إجزام ( الإختبار بتاع نص السنه ..مهو الفلاحين ليهم فى الإنجليزى ما إعترضناش بس المهم الدخله ).
- وغير كده فيه نوعيه من الناس ما تستناش منهم أى زوق او إتيكيت ..ريح دماغك من نحيتهم خاااالص خالص
- 1- البنت المتسلطه (لأنها مش شايفه نفسها بتعمل حاجه غلط ومابتسمعش نصيحة حد )
- 2- الشاب الأرعن ( لأنه شايف نفسه زياده عن اللزوم وشايف الغلط صح وموافق عليه وراضى بيه وعايش بيه)
- 3- الميت ( لأنه مش هايرد عليك )
- 4- محافظة بنى سويف إلا من رحم ربى (جرب وهاتقول مازن قال )
- 5- مواطن طالع ميكروباص أو أوتوبيس ومستنى بقاله ساعه ونص ومفيش غير الاوتوبيس ده بس.يلهوى يا لهوى او ده بقى ممكن يدهوس عليك ومايحسش او يحس وينفض كأن القايمه قامت وكله بيقول نفسى نفسى .
- 6- ست عجوزه وكبيره فى السن ( عمممممممممممرها ماتقوملك فى الميكروباص او الاوتوبيس بالزات رغم إن خيرك مغرقها وأفضالك مغرقاها كتير قبل كده )
- ...والنماذج كتير ..بس حضرنى موقف بيقول
- مره كنت راجع من ميدان الجيزه مقفهر وزعلان ..وقرفان ..والجماعه بتوع الدم لسه مصفيين دمى بس قلت ياض إحسب ثواب ورجعت أفكر مع نفسى الدنيا مليانه ناس إشمعنى إخترنى أنا اللى أتبرع بالدم وشدنى كده وقاللى تعالى ( يمكن علشان شكلى غلبان ...يمكن ) جه مينى باص مدلدل منه تباع ظريف قوى شبه فردة الصرمه بالظبط وعمال يعيد فى الكلمه لحد ما صدعنى ..مشعل هاااااااااااااارم هاااااااارم مشعل رمايه هاااااااااارم هاااااااااارم ( يقصد مشعل والرمايه هنااااااااااك والهرم هنا ...هايلف الكوره الأرضيه ). ماتعرفلوش هو رايح ولا راجع.
- المهم عمال ينادى فاضيه مشعل هرم ..فاضيه مشعل هرم ..
- رحت سألته بمنتهى الزوق والإيتيكيت : لو سمحت إنت رايح فين
- - مشعل هرم
- - فيه مكان ؟؟
- - فيه يا بوب .... واحد معاك ياأسطى .
- طلعت يا اخويا إنى ألاقى كرسى فاضى ؟؟؟...مفيش . رحت سألته قلتله : مش حضرتك قلت فيه مكان ..أومال مفيش مكان ليه ..قاللى : مش إنت واقف فى مكان ؟! ..يبقى ده مكانك..
- قلت فى عقل بالى : يا صلاة الزين ...فيه مكان للوقوف مش للقعاد !!1 طب والله كويس.
- بعد شويه نده أبو جاعوره بصوت مستفز : خش جوه كده يا برنس وسع للى داخل .
- وفعلا دخلت وانا بقرش حبهان تحت ضرسى .
- وشويه وطلع زبون ....وخش جوه يا برنس ...دخل البرنس...والبرنس أصلا قصير ما بيمسكش فى الحديده اللى فوق...بيضطر يمسك فى طرف الكرسى بإيد والطرف التانى بإيد ..
- وخد عندك
- نظرات بقرف من البنات ( فاكرينى بتلزق ) وهو مش بمزاجى أصلا ..
- تجاوزات كتير بتحصل من ورا ضهرى وأنا ساكت ( كلمه بعيدة المدى ).. خلينا ساكتين أحسن
- روايح غبيه ( عكس زكيه ) من الإخوه الطوال اللى رافعين إيديهم وماسكين الجديده ( بالمناسبه إفتكرت نكته مره واحد قوى وغبى دخل أوتوبيس لأول مره فى حياته ولقى الناس ماسكين الماسوره كلهم ..قال بقى مش عارفين تخلعوها ...طب آآآآهييييييييييى ).
- وطلعلى عم الكتكوت تانى وبيوقول يا خضرلت خشوا جوه.
- رحت قلتله نخش فين ؟؟ أنا رجلى لامسه الكنبه الآخرانيه ..أطله بره الزجاج الخلفى بقى ولا إيه ؟؟
- قاللى معلش يا هندزه لازم نستحمل بعدينا (هندسه ...وبعضينا ...دى المفردات اللى فى التيكست اللى قالها الدكتور تباع )
- وقال مكملا : مهو إنت لو ركبت أى ميكروباص فى الوقت ده بردك هاتلاقيه زحمه علشان وكت خروج الموزفين )
- هندزه وميكروباظ فى يوم واحد...ده باينه يوم المنى والهنا.
- وأخيرا وصلنا لمشعل ونزلت وإديته الجنيه وجريت على ميكروباص كرداسه وروحت نمت زى الفسيخه وبعد نص ساعه نوم قمت مفزوع وأنا بقول : يا إبن الحراميه ..ما إدانيش الربع بقيت الجنيه .
ليست هناك تعليقات:
إرسال تعليق