كنت قاعد على النت ولاقيت دعوه لدخول الفيس بوك ... وفعلا عملت اكاونت ودخلت طلبت الصداقات و كتبت رقم تليفونى واخدت رقمى السرى فى رساله من الفيس بوك كاى مواطن عادى داخل يعمل أكاونت ... رفعت رسمتين بس كنت طلعتهم فى بحلقه زمان لما كانت بحلقه دوت كوم مش دوت نت زى دلوقتى b7l2a.net .
ووحطيت صورتى ودخلت الميت مليون منتدى اللى مشترك فيهم علشان أشهر موقعى اللى هو حسابى على الفيس ... جاتلى رسالى من مشرفة فى قسم كنت عملت مساهمة فيه فيها رابط للأكاونت بتاعى بتقوللى إنت فعلا شكلك طيب وغلبان بس أنا مسحت مشاركتك علشان صديقاتك على النت عريانين قوى وشكلهم فاضح ... قلت فى بالى : ده إيه الرخامه دى تمسح مشاركتى علشان صديقاتى عريانين ؟؟
وهى مالها علشان تقول عليا شكلى غلبانوكمان بتقول صحباتى عريانين ... إتظربنت شويه بس رجعت راجعت نفسى تانى .
وقلت يااااااض إمسح صداقتك بالبنات دى وإكسب ود المنتدى علشان الناس تصاحبك .
وعدت وراحت لحالها .. بعديها فكرت إنى لازم أظبط الأكاونت بتاعى وحطيت صور كتير جدا لحبلص إبن أختى وصور ليا كتيييييييييييير جدا ألبوم للحصاد ألبوم للتهييس ألبوم صور شخصيه
وإرضاء للنرجسيه و حب الزات.
وبعد ما ربنا كرمنى وجبت إسكانر رفت صور لرسوماتى .
بس إفتكرت إنى نسيت حاجه قلت ياض رفعت كل حاجه .. ليه مارفعتش الورق بتاعك
شهادة الجيش . البطاقه . بطاقة التموين . كارنيه الشركه. الفيزا . شهادة الميلاد . شهادة الوفاه. شهادة أن لا إله إلا الله محمد رسول الله. شهادة معاملة الاطفال .
ليست هناك تعليقات:
إرسال تعليق