لسه فاكر اول حب ليا ... حبى الاول ..هند ...حبيبتى اللتى لاتزال حبيبتى ..ينبض قلبى بإسمها ...هند..هند..هند.
كنت بحبها ..بحبها فى سكونها ..بحبها فى ثورتها ..بحبها وهى قاعد ووهى نايمه ووهى صاحيهه ووهى واقفه ووهى عامله نفسها نايمه .
بحبها بميك أب ومن غير ميك أب .
بحب خفتها ورقتها وشنطتها وجزمتها وبلوزتها ومشيتها وقاعدتها .
بحب النسيم لما يعدى من جنبها وينقل معاه برفانها وامراضها ( إيه القرف ده ..بقرف قوى ).
بحبها وحبها مالى عليا لكون.. وفى بعدها ببقى كأنى قارش تحت ضرسى بزر ليمون.
لا يلوموا علينا الليمون.
كنت بحبها حتى وهى بتعاقبنى وهى بتزنبنى وهى بتألمنى وبتكسرنى وبتحطمنى.
كنت فى الإبتدائى وهى أبلتى وعندها 25 سنه فى عز شبابها ..وانا برده 6 سنين ..يعنى عز شبابى برده وكنت وقتها أقدر ابنى بيت ( بالمكعبات ) واكون اسره ( من العرايس ) وأعمل شقه ( شقة بطيخ او شقة عيش ) ..
بس للاسف ..يوم ما جيت اصارحها بحبى ...قعدت تاااااااااااااااااااااااااااضحك ..معرفش ليه ..؟؟؟
...لسه فاكر اول يوم إتقابلنا ونظرة الإعجاب ( او تعجب مش فاكر) وقالتلى بمنتهى الرقه إسمك إيه يا حبيبى ... رديت بمنتهى البرآئه : من اولها كده حبيبى ؟؟؟!!! طب كنتى تستنى نتعرف على بعض يا حياتى ..
كان اى مدرس يقربلها كنت ببهدل امه .أستاذ أسعد مسكته ضربته فى إيده بوشى كنت ها أخلعهالو .
ولا أستاذ سليمان لما إديته بالمؤخره فى رجليه .
بس للأسف كل شىء إنتهى وقالتهالى صريحه وضيحه جريحه..بكره تجيب ولى أمرك يا حيوان ...
قلت فى سرى : إخص على نتانة اهلك دا إنتى طلعتى عيلة زباله ...وسيبتها وهى عنيها قربت تبظ لبره من الزهول ومشيت ( لأ مشيت إيه ) قصدى جريت... جريت إيه ؟؟ قصدى إختفيت!!!!
ليست هناك تعليقات:
إرسال تعليق