كنت فى رمضان اللى فات وكانو ا عندنا فى الشركه بيوزعوا وجبات للفطار وكانت الوجبه عباره عن ( 3 أرغفة عيش - علبة طبيخ - طبق رز عليه ورك فرخه - علبة سلطة طحينه - كيس ورق فيه صوابع بطاطس - ومعاه كيس كاتشب - ومعلقه طبعا - وكارتونه شبه كارتونة الجزم مكتوب عليها جاد ( مين جاد ده ؟ محدش يعرف ومش مهم أصلا المهم ناكل علشان طلعان عين أبونا طول النهار وبنفرفر من الجوع والعطش ) .
والمشكله بقى إن الجماعه الفلاحين الغلبه بتوعنا فى الشركه (واللى بالمناسبه مفيش غيرهم أصلا ) .. ما يعرفوش يعنى إيه كاتشب ولا الإختراع ده بيستخدم فى إيه ولا يعرفوا أى حاجه عن أهدافه القوميه ولا الحريبيه .
لما بييجى وقت الفطار كلة بيفتح العلبه الكارتون بتاعته زى المسروع المفجوع وينهش الورك يا ولداه و ينزل على الرز يلقط زى الفرخه (بالمناسبه إفتكرت نكته مره راجل بخيل قوى كان عازم ناس عنده وكل ما ابنه يخش بإطباق الاكل يحط رز بس لحد ما الضيوف زهقت من اكل الرز ودخل الولد وقال لباباه : بابا أدخل الفراخ رد أبوه وقال يا بنى الناس لسه ما خلصوش الرز ... والولد كرر الموضوع ده كذا مره ..أدخل الفراخ وفى كل مره يقول فيها البخيل الضيوف لسه ما خلصوش الرز ... لحد ما قال واحد من الضيوف يا عم زهقنا من الرز دخل الفراخ بقى ... الراجل البخيل دخل على الضيوف فراخ صاحيه اكلت الرز)
المهم فضيت كيس الكاتشب على البطاطس فى ساندوتش واكلتهم وجيت آكل الفراخ مالقيتش كاتشب قلت استلف من زمايلى ...
قولت يا جماعه اللى ما بيحبش الكاتشب يباصيهولى ... صمت رهيب ... مش سامع غير صوت الإفتراس بتاعهم للاكل بس
قولت يبقى أعيد صياغة السؤال بشكل مختلف ( يا جماعه اللى لقى فى العلبة كيس أحمر كده يبعتهولى انا بأكل اللى فيه ويا دوب ما كملتش الكلمه لقيت نفسى إتردمت إكياس كاتشب من هنا وهناك ومش بنى آدمين اللى بيرمو دول شوية بقر .. واللى بيرمى في عينى وفى رجلى وفى وشى ... والغريب فى القصه إنهم مش فاهمين الكاتشب بيشتغل إزاى فاكرينه كيس نافتالين باين ولا حاجه زى الصلصه بس على صغير ... وكل ما امشى فى حته فى الشركه وأدوس على كيس كاتشب ألاقيه مليان اغسله من بره وأشيله للفطار..
كلهم راميينه مليان !!!!
...وقعدت على كده فتره طويله من الشهر الكريم ... لحد ما جيت فى يوم بقوللهم يا جماعه هاتو اكياس الكاتشب قولوا : لأ يا خوووييييييييا عرفنا بيتاكل إزاى..
قولتلهم إزاى بقى يا فالح منك له ؟؟!!
قالوا بيتحط على الرز يا نااااااصح .
ليست هناك تعليقات:
إرسال تعليق