أى موقف أو اى خبطه لما بتشوفه بتقول ... آآآآيييى ...أو آآآآه .. سواء كانت جت فيك أو فى غيرك .
مره كنت مع اختى الصغيره وانا أكبر منها بسنه ونص بس كنت ضئيل... ولا زلت برده ..
فراحت شيلانى وكانت أنا وهى لسه بيبى مقدرتش تشيلنى وقعتنى على دقنى خيطوهالى ييجى خمس غرز بدون بنج عند حلاق الصحه فى قريتنا والله لحد الآن لسه فاكر الألم وبقول والله من شدته وقسوته لسه فاكره رغم إن عمرى ساعتها حوالى 3 سنين ونص بس .
ومره أمى كانت متضايقه منى علشان زبلت الشقه راحت خبطانى فى وسط نافوخى بعصاية المقشه ... عمرى فى حياتى ما حلقت اقرع ولا شوفت شكل قراعتى خالص لكن لما قررت إنى احلق لقيت مكات الخبطه ويوميها أمى كلت حتة علقة من بابا ... والله يا جماعه انا ما خبصتش .. الولد مش خباص أصلا ..دى اختى هى اللى جريت ..
بس إن جينا للحق ..انا عايز الحرق.
أنا بجد واد متعب وشقى وانا طفل ولحد الآن كنت ربنا رزقنا بأختى الصغيره وأنا بيبى خالص يا دوب بمشى وبتكلم بالعافيه كنت أروح لماما وهى بتغسل الصحون ولا حاجه وأقوللها :خلاص
تقول يعنى إيه خلاص أقوللها فطسطها تقول إيه دى ... أقوللها فطست النوننه أمى تروح تسمع الكلمه دى وتجرى على آخر سرعه على البنوته يا عينى تحت ييجى 25 شلته على 30 مخده تقعد تحفر على البت لحد ما تلاقيها بتزنهر ولونها أزرق من الغباء اللى عملته فيها .... ويا ريت كانت مره ولا مرتين ... ده على طوووول ..لحد ما كبرت شويه وبقت تمشى ... أمى بتقول : ستر ربنا يا مازن إنك وإنت صغير كنت صريح كنت تعمل العمله وتيجى تقول أنا عملت كذا.
المهم لما كبرت وإشتغلت من هنا لهنا وعرفت أشكال وطبايع وإتصدمت فى اخلاق غير الأخلاق ونفوس غير النفوس .. إتعلمت حاجه ( عمرى ما أقول آى خالص ) وفى يوم كنت مع فوزى بنحمص المكسرات فى الفرن بتاع مونجنيز لتصنيع الكيك والحلويات ...إيدى إتحرقت طبعا جريت كنت ها اجرى أدلق عيها ميه لكن فوزى منه لله إقترح عليا إقتراح قاللى ياد مش إنت بتحب عبير؟؟!!! ده أحسن موقف علشان تصعب عليها خش عليها بإيدك و قول آآيييى قولتله انا اقول آى .. إنت إتجننت ... وبعدين عبير رفضانى علشان أنا أصغر منها بسنه وبتقول عايزاه شاب ناضح ..
ضحك الظريف وقاللى لما تشوفك غتحرقت ها تقول ده نضج وإستو ى وجاهز على الاكل على طول هههه
المهم الواد دخل على البت وعمل حوار وقاللها إنى فى حاله خطر وإتحرقت وبقت عاهه وبعديها رحت فاتح انا الباب وداخل وبقول بطريقه طالعه من تحت الضرس أىأى أىأييى البت اول ما شافت الحرق قالت جمله تاريخيه عمرى ما ها نساها
يا حبيبى يا بنيييى
ليست هناك تعليقات:
إرسال تعليق