النهارده على خلاف ما وعدتكم مش ها نكمل راديو صوت العبط ... ل ها نشوف حاجه حلوه شويه زى لعبه كده انا عملتها وجمعت نتايجها وها أعرضهالكم
أولا اللعبه دى إسمها إيه رأيك فى مازن بصراحه ؟؟؟!!
وكانت الآراء زى ما إنتم شايفين
ماما : إبنى طول عمره مؤدب ومتربى والناس بتحسدنى عليه
ماما ( بعد ما طلبت منى 200 جنيه وقلتلها يحنن ) : عيل أهبل إبن هبله أوسخ من الوساخه .
بابا : شاب ونعم الشباب زوق وأدب وأخلاق وأنا عن نفسى بفتخر فى وسط زمايلى المدرسين بيه و بأخلاقه والناس بتحسدنى عليه .
بابا ( بعد ما عرف إنى انا اللى خربت الفيديو والشريط إتزنق جوه ) : عيل حيواااااااااان عمره ما هايكبر وهايفضل كده مسببلى خساير طول عمره عشان حتة حمار ما بيفهمش .
أختى : مازن رخم وانانى ومابيحبش حد يلعب فى حاجته .
أختى (بعد ما جيبتلها هدية فى عيد ميلادها) : أخويا حبيبى اللى ماليش غيره أممممووووووه (بوسه ) .
عمتى ( من ورايا ) : عيل اهطل ومش عارفه أخويا طالع بيه السما ليه
عمتى ( قدامى ) : حبيب عمتوا تعالى ياض فى حضنى ياااااض فينك يا معفن مش باين ولا بتسأل فين عمتى ولا أى حاجه يا ندل .
خالتى : هو مش إبن اختى !!! بس بوررررييييييييييه من ده عيل .
بنت خالتى : رخم
إبن خالتى ( وهو معايا ع الشات ) :هههههه إزيك ياض يا مازن يا قصير انا اطول منك يااااض .
إبن خالتى ( بره الشات ) : إزيك يا مازن ... يا جماعه دع مازن القصي... قصدى إبن خالتى اللى قولتلكم عليه .
رئيسى فى العمل رقم واحد : مزموز ده حبيبى .
هو هوا برده بعد ما بوظت الموعده اللى شغال عليها : قصيييييييااااار وسكتنا كمان غبى ؟؟!!!!
رئيسى فى العمل رقم إتنين : واد جدع وبتاع شغل .
هو هوا برده لما وقفت فى سكة المشار وكان ها يقسمنى نصين : إطلع بره يا حمااااااااااااااااااااار.
زمايلى اللى أقدم منى .
1: طيب .
2 : غلبان.
3: والله يا جدعان واد بتاع شغل وغلبان بس هم اللى مستهفقينه وبيضحكوا عليه فى الاجازات.
4: واد وصولى وقورنى .
5: مازن متكبر قوى وما بيحبش حد يعلم عليه فى الشغل ولو واحد جاى بعديه بيوم قاله إعمل كذا ممكن يتظربن عليه ويبيعه للريس على طول.
6: عيل بياع ووسخ و بيبيع زمايله
7: عيل جدع والله يا جدعان إنتوا اللى عايزين تشأطوه علشان واقف فى طريقكم للوصول للسلطه .
8 : هو غلبان وواخد جنب من الناس زى البنت المستحيه كده ليه ؟؟؟!!!
9 : لألألألأ ياااعم دا حبيب الريس ده بلاش نقربله خاالص ليغضب علينا ولا حاجه.
10 : عيل لسه بيعملها على نفسه ومسكوه علينا ريس يا اخى أم دى شركه قورنيه عايزه الحرق عليها وعلى صحابها.
وبكده نكون إستوفينا عدد كبير جدا من الناس اللى أدلوا بآرائهم فيا بمنتهى الصراحه يا ترى بقى من خلال الصور أو النماذج دى تقدر تحدد انا شخص كويس ولا شخص زباله
ليست هناك تعليقات:
إرسال تعليق