شا ب سكره وشمعه منوره وفى الضحك أبو المخمخه والعبقره
ده ملخص على قنديل من وجهة نظر اللى بيحبوه ...( وجهة نظرى انا مازن الصروى لسه ماقلتهاش ) جايه فى السكه اهى
فى يوم دخلت الدستور أدور على أى حد من الرسامين ( الكلام ده زمان قبل ما العيال اللى دخلو الدستور سد خانه دول ما يخشوه ) كان الرسامين ساعتها وليد طاهر وهانى شمس ومخلوف و قنديل ( محمد قنديل الرسام مش المطرب ) وعبد الله احمد و محمد عبد الله ودعاء العدل وكل دول ليهم اكاونتات عندى على الفيس ما عدا مخلوف طبعا وعبد الله احمد مسحتهم وانا مبسوط ...
فى اليوم ده كنت بدور على اى حد من الرسامين يشوف رسمى وسألت شاب طويل رفيع عنيه ضيقين وتحس إنه غلبان قوى ويخش قلبك على طول.... قلتله لو سمحت هم رسامين الكاريكاتير راحوا فين ... قاللى والله كان لسه قنديل أخويا هنا ونزل ... قصير كده وشعره كبير ..
قلتله طب حضرتك لو عايز تتفرج على رسوماتى إتفضل ...إبتسم وقاللى والله أنا مش رسام قلتله عادى يا عم مش شرط تكون رسام إتفرج وخلاص...وإتعرفت عليه وقاللى إنه إسمه على قنديل وبيكتب فى صفحة دعاء سلطان ....الفن ....ولقيت برده مناخير طالعلها بنى آدم إسمها خالد كساب ....ولقيت عم بقلظ اللى مسميينه رئيس التحرير إبراهيم عيسى ..ولقيت أحمد بتاع البوفيه وقعدنا نهزر مع بعض ....غير المزز والشباب اللى زى الورد ..
ومن الآخر برده اللى نصحنى بالمشوار المهبب ده كان كريم الشيخ ...
وعدت الأيام وكريم كان ناوى يعمل مجله ويسميها بحلقه دوت كوم واللى وقفناها علشان مشاكل مع مصطفى رئيس الشركه اللى هاتدينا الموقع وعملنا بدالها بحلقه دوت نت ... وكان فى تجهيزات بحلقة دوت كوم الاولانيه معانا ناهد سمير ..وجينا وأكرم وأحمد دبور وناس تانيه زى العسل ومروه البان وناس جامده
وكان الإجتماع فى الأمريكين رمسيس وخدنا طرابيزه وقعدنا مع بعض وجه شاب وسيم و طويل بص علينا ومشى... وبعدين رجع تانى وجه وإتعرفنا على بعض وطلع مهندس كومبيوتر إسمه أحمد هندى ( شخصيه زى العسل ) وجه بعد كده على قنديل وليه ها يمشى ندهتله وقلت على على ... راح عرف إننا إحنا وجه وعقد معانا وكان معانا راجل أكبرنا سنا مهندس كمبيوتر هو كمان وقعد يرطن اجنبى راح عمك على طلع فيه :
كلمنى عربى لو سمحت عايز أفهمك .. الراجل خاف وقال حاضر خلصنا كلام وقومنا نمشى لقيته معجب قوى بشنطتى ... طبعا ضحكت وقلتله ما تغلاش عليك يا برنس طبعا ما أخدهاش دا أنا دقهلاوى حريص يابا
ومشينا مع بعض وفى السكه سألته قلتله إنت بتعمل تحليلك فى الدستور للأغانى والألبومات والألحان على أساس مدروس ولا ااااا......كده .....قالى صلى على النبى ربنا خلقلنا إذنين وبق واحد علشان نسمع أكتر ما نتكلم وربنا كل أمره ونهيه لينا كان فى كلمه
قامت حروب ومعارك علشان الكلمه دى الكلمه دى يا تدخلك الجنه يا إما تدخل النار .... وبعدين لقيت نفسى وصلت لمحطة الميكروباص وسلمت عليه وقلتله |إنى سعيد بإنى شوفتك .. قاللى .. أنا أسعد ...
بس .
وركبت مع كريم علشان نروح البيت ولقلتله إنى قابلت على قنديل وكلمته وسألته ..وكده.
بصلى كريم بقرف وقاللى : ها وبعدين قاللك يعنى هو دارس الموسيقى ولا مش دارس
... سكتت شويه وقلتله : تصدق الواد سرح بيا وماقلش حاجه .
بصلى بقرف أكتر وقاللى ناصح ...سيبته يحور عليك ويوديك البحر ويرجعك عطشان هههههههه .
ليست هناك تعليقات:
إرسال تعليق