حينكش فينكش
كلمه كتير بقولها وانا مع أصحابى لما بنسى أو اتناسى شىء
يابنى إنت يا عم الحينكش فينكش إنت ... أيوه إنت ..إخلص شويه
اوعى البت الحينكش جايه
ده أنا متغدى غدوه آآآآآآخر حينكيش فينكيش
إنجز كده وخليك واد حينكش فينكش
إنت ها تتحنكشللى وتتفنكشلى فى امهم للصبح
وهلم جرجر كده من الحنكشه والفنكشه حتى كان ليا باب زمان فى بحلقه إسمه حنكشه
اللى حصل يا سيدى زمان كنت شغال فى شغلانه جميله جدا .... كنت نصااااااااب من الآخر
عارف الإعلانات بتاعة إبادة الحشرات فى الأهرام أهو بقى الشركات دى عباره عن بير سلم نايم فيه بتاع 5 او 6 شباب ومعاهم الكبير بتاعهم وحاطط موبايله فى الجريده وبيتصل بيهم ناس مهمين للأسف ووزراء وممثلين و سياسيين وسفراء وكلهم بيتخدعوا فى المظاهر وخش بالكلمتين ( أيوه يا فندم إحنا شركة النظافه وبنعمل كذا كذا كذا ) وكله نصب بيقولوا شامبوهات سجاد مستورده وهو إريال دايب فى ميه بيقولوا تركيبه تموت الفار وهى سم فيران عادى و ومزودينه دشيشه بتاعة فراخ بيقولوا مبيد حشرى لو شربته إنته ما يعمللكش حاجه هايعمل للحشره إيه يعنى ؟؟؟؟
وبيقولوا بالتبخير ومواد تحفظ ضد العفونه وكل ده كلام فارغ حاطين داونى وعاملينه معطر وجايبين كومبروسر من اللى بيتباع فى اى محل ادوات كهربائيه للورش
وبخخخخخخخخخخخخخخ والزبون يصدق و يقول دول ناس شغالين على ميه بيضا ... إدفع يا واد إدفع وكلللللللللل مره خناقه على الفاتوره
بصراحه فواتيرهم مستفزه اللى يغسل سجادتين وعايز 100 جنيه
واللى يبخرله اوضطتين وعايز 800 جنيه
والناس بقى اللى شبع بعد جوعه يمسكوه يهروه شتيمه ( فى مره كان فيه اوردر عند راجل وقالوا عايزين توتال 1500 جنيه تبخير شقه كامله .. الراجل كان بيصللى . راح قاطع الصلاه وخبط شخيييييييييييييير وقع البياض من على الحيطه هههههههه
ومره كنا عند نور الممثله وإستشوت الفلوس وكانت عايزه تدفع اكتر هههههه
ومره كنت عند إلهام شاهين ودفعتلى 100 جنيه تيبس ( ناس مش تعبانه فى الفلوس يا عم ) ساعتها كان مطلوب منى اشيل رخامه تقيله جدا وكنت لسه صغير ساعتها تخيلوا عملت إيه ؟؟؟
شالها هى بدالى
نفسيتى بدات تسلم على الأرض من المال الحرام واللى يا ريته كان كتير ا انا كنت بتعب وبينصبوا عليا انا كمان وبيدونى ملاليم يقبضوا 800 جنيه ونصيبى يطلع 10 جنيه ولا حاجه
وبعد ما عملت معاهم الغلط وقررت افضحهم بعتولى واحد يهدى النفوس وقاللى يا عم دول عيال هيلليس كونتريلاس
قولتلوا إنته راضى عن حياتك كده يا محمود .. بص فى الأرض وقاللى عادى يا عم أى كلام حينكيش فينكيش بيجيب فلوس وبقضى مصلحه مانقولش لأ
رددت الكلمه بصوت واطى كانى بكلم نفسى
أى كلام حينكيش فينكيش بيجيب فلوس
أى كلام حينكيش فينكيش بيجيب فلوس
أى كلام حينكيش فينكيش بيجيب فلوس
ومن ساعتها وكلمة حينكيش فينكيش ملازمانى على طول الى يومنا هذا
ليست هناك تعليقات:
إرسال تعليق