بمناسبة إن إحنا خلاص دخلنا 2010 وكل سنه وإنتم طيبين وبالصحة والسلامه ويعود عليكم الأيام بخير ومن قدم شىء بيداه إلتقاه .. هنيااااااااالك يافاعل الخير ( إيه جو الشحاته اللى الواحد دخل فيه ده ؟ ) .
دخول 2010 عليا أنا بالزات بيفكرنى بحاجه حلوه قوى بيفكرنى بالصفر الجميل اللى أخدناه ساعة إستفتاء البلد المضيفة للمنديال (ولو كانت البلد نضيفه كانت بقت هى المضيفه ) كنت مزنوق زى خلق الله ما بيتزنقوا ( الزنقه حق لكل مواطن يتزنق فى اى وقت والدوله مجبره إنها تفك زنقته على الأقل بتوفير دورات مياه وبصراحه أنا من مكانى هذا بقول للإخوه المسئولين واحد واحد (والله ماجصرت) جريت على حمام عمومى لقيت حمامات كتييييييييير بس إنت أشر وطلباتك اوامر اول حمام ماكنش فاضى إستنيت شويه
فحسيت إنى خلاص مش قادر خبطت على الحمام الأولانى ..إحم التانى إحم التالت إحم الرابع ..إيييييييه انا لسه داخل .الخامس محدش رد خبطت تانى محدش رد قمت فاتح بالراحه بصيت وقفلت الباب بسرعه ( المنظر صعب صعب ) حلنى وفكنى بقى عقبال ما واحد خرج ودخلت أنا مكانه كانت الامور وصلت لحاله لا تحتمل
وأنا قاعد مرتاااااااااااااااح بعد التعب عمال أبص على الحيطة وأقرأ اللى مكتوب عليها
اللى كاتبلى ( على العموم السمك بيعرف يعوم فى الواقع البحر مليان قواقع ) فيلسوف عصره وأوناه جاب التايهه واللى كاتب واللى كاتب مفيش صاحب يتصاحب
واللى كاتب أبص لروحى فجأه واللى كاتب البواسير تعبانى يانى واللى كاتب الرجوله ضاعت فى مطش الجزائر واللى بيشتم فى المنايفه واللى بيرد عليه وبيشتم فى بتوع بنى سويف إن قابلك كلب بوسه وإن قابلك منوفى إعمل فيه إيه
واللى كاتب لو داخل بنى سويف سن إيه زى السيف كلام فاضى يعنى وخش بقى على الإعلانات وأرقام الموبايلات واللى كاتب رقم واحد صاحبه وكاتب تحتيه إذا كنت تريد المتعه نحن فتيات بنات عائلات محترمات
واللى عامل إعلان خد فطيرك والمصيبه بقى اللى كاتبلى كفتة الرايق يا ترى يقصد أنهى كفتة بالظبط بعد ما خرجت وفكرت فى الموضوع بطنى كركبت أكتر من الاول فجريت تانى على الحمام بس للأسف كان الحمام رجع إتشغل تانى
ليست هناك تعليقات:
إرسال تعليق