بعد الفطار على حين غفله منى سمعت صوت تجشأ مقزز من إبن خالتى المقرف ... رحت بصيتله بقرف وقولتله صحه يا حيوان و ماتعملهاش تانى إنسان معفن فعلا اللى يطلع حاجه بالشكل ده فى وش البنى آدمين التانيين من غير خشا ولا دم المهم إن اللوح قعد يضحك هههه يا ظرف أهلك يا بعيد.
كنا بنتفرج على التلفيزيون وكانت بنت خالتى الصغيره المفعوصه هى اللى ماسكه الريموت ولاااااااااااااا فى حاجه عجباها عماله تقلب لحد ما دمى إتحرق
وأنا بقول وكلى غيظ متدارى:- رورو سيبى الماتش
( قلبت الماتش )
رورو سيبى المسلسل ( قلبت المسلسل ) رورو يلا روحى ذاكرى
لفت وبصت وعنيها بتطق شرار وقالتلى : مش داخله ... وإحنا فى الأجازه أصلا يا ذكى
ملحوظه
( محسوبكم ليه شخصيه مسيطره على الأطفال ....... ما عدا رورو ... مالهاش كبير)
وفجأه وكأنها قاصده تحرق دمى راحت سايبه كليب لواد كده شكله غريب قوى وعامل فى نفسه حاجات غريبه جدا ولابس بدله بيضا قديمه من أيام حرب المعيز
وكنت حاسس إنى شفت صورته قبل كده .... آه هو ده الواد اللى إبن خالتى معلق صورته فى أوضته وكان معلق قلاده على صدره كبيره بطريقه ملفته
راحت رورو لفت بصيتلى وقالت بكل تناكه بتحب تامر
قولتلها أنا بحب كل الناس
ضحكت وقالت أنا قصدى على تامر حسنى قلت مين تامر حسنى ..قالت اللى بيغنى ده
قولت يا شيخه هو ده بقى تامر حسنى اللى بيقوله عليه مش ده برده اللى معلق على صدره درع الدورى جوه على حيظة أخوكى
قعدت تضحك وقالت أه هو دا أختى بتموت فيه قولتلها بتموووووت فيه يا سلام
ما تموت فى وسط أهلها أحسن صحيح الحظ لما يطاطى يخلى الأعمى سعاتى
أنا أفتكر للبعيد ده أغانى تسم البدن يعنى ينفع حد يقول لواحده ( فى غيرك أنا عنه أهم ) ولا (إتجننتى فى عقلك ) ولا ( أتاريها لأى حد أتاريها لأى حد اتاريها لأى حد )
إيه الكلام الفارغ ده واخرتها على فكره اللى يسمع تامر ده أكيد مجنون
مجنون مجنون فهمى.. رسمى.. نظمى.
ليست هناك تعليقات:
إرسال تعليق