إزاى إتعرفت على فؤش

قصة تعرفى على فؤش قصه بجد تضحك وتستاهل إنى أكتبها هنا فى الجروب بتاعى إحم سورى .. قصدى بتاعكم .
القصه ومافيها إنى جيت الشركه فى 2008 ودخلت فى قسم جديد لسه بينشأ وكنت من منشأيه وكان رئيسه راجل سكره ( محدش بيحبه خاااااالص ) بس هو شاف فيا إنى إبن ناس وجيت المكان البويستى بو ده غلط أصلا فبقى بيعاملنى برفق أكتر من زمايلى الفلاحين اللى مش فارقه معاهم .
وطبعا الإحترام المتبادل ما بيننا كان سبب فى قوة العلاقه يعنى مثلا المشرفين زمايله بيقلوله يا معتز والرءساء بتوعه بيقولوله يا معتز والعمال بتوعه بيقولوله يا ريس معتز .. أنا الوحيد اللى من اول ما دخلت الشركه بقولله يا بش مهندس معتز فطبعا فرح بيها قوى وخصوصا إنه أصلا لا بش مهنس ولا حاجه ...ده حتى دبلوم صنايع ..
وبالشكل ده الناس مشيت من القسم وإتبقيت أنا وبقيت مسؤل عن مجموعه من العمال الجديده وطبعا هو فاكر إن أنا إبن ناس لكن الخازوق بقى إنى فى الشغل ماعرفش أبويا وأكتر واحد صوته عالى ولسانه عايز قطعه وده خلاه يحبنى أكتر ... غير طبعا الصلاه و الحرص عليها ( ده المفروض يكون أساسى فى أى شاب ) وطبعا المفروض عند الكوجى مش هنا .
وبعد ييجى سنتين من تعيينى مشرف للشداد والمنشار ودخولى لمرحلة التوجيه اللى بعديها المفروض أبقى فنى لوحه وبعديها مشرف ورديه وبعديها رئيس قسم زى معتز ( يااااااااه إمتى بقى أشأطه من على مكتبه ده وأقعد انا بقى ) ( ههههه نداله نداله على حق يعنى )
.. المهم بعد السنتين دول جالى فؤش مطرود من قسم التغليف ( هو بصراحه قسم رخم وشغله تقيل جدا ..يعتبر إحنا أحسن منهم ( المكابس يعنى ) ) .
وكنت كعادتى أشغل الناس وأخرج أفطر وبعد شويه لقيته خارج عليا ومعاه قزازه سفن وأنا برده كنت حاطط جنبى قزازة سفن وقرب وقاللى مش حضرتك فنى المنشار: قلتله أه .
قاللى إنت مازن ؟ قلتله آآآآآآآآه . قاللى سلامتك قلتله إخلص عايز إيه يعنى مش شايفنى بفطر؟!!!!
قاللى أنا عايز أخرج أفطر .. قلتله وجنابك بقى ماسك فى إيديك قزازة سفن وجاى تقولى أفطر .. ما إنت فطرت خلاص ؟؟ لزمتها إيه بقى تيجى تستأذن ما كان من الاول يا خويا ..
رد عليا بطريقه خليتنى مزهول : ما تروق بقى يا مزوووون .
- تعالى يلا... إنت إزاى تدلعنى إنت تعرفنى منين أصلا ؟
- سألت يا مزوووون واللى يسأل ما يتوهش .
- يا خفه إنت... طب يلا روح على شغلك يلا .( جتك القرف كلك سجاير ... بقرف قوى من السجاير ومن اللى بيشربها ) ( الكلام ده قلته بعد ما مشى فى سرى ) .
وبعد ما مشى على طول جاى برفع السفن على بقى ورحت تافف كل اللى شربته على الارض وقعدت أضحك أضحك أضحك بس ضحك مش من الإنبساط ...لأ ضحك غيظ .
البييييييييييه سهانى وبدل قزازتى اللى فيها سفن بقزازه تانيه فيها ميه ولدع هو السفن ومشى .
المهم قلت مش ها اعمل عقلى بعقل واحد ضرييييب وبتاع حشيش والشركات ياما بتلم بس بعد كده ها أجيب من القزازه البلاستيك امو غطا علشان ما يعرفش يبدلها .. وحصل تانى وجى معاه قزازه عاديه ( مصنوعه من القزاز يعنى ) وقعد برده يقول كلام مالوش لزمه وانا ابصلله ومتطمن إنه مش ها يعرف يبدل حاجه لن دى بلاستك ودى قزاز وبعد ما مشى بفتح الغظا بتاع السفن لقيت وشى وجسمى وكلى على بعضى غرقت سفن من الفوران أتاريه الحيوان رجها جامد ورجعها تانى مكانها ومن هنا تفكيره عجبنى وبقينا صحاب ( وبرده بيعمل فيا نفس العمايل بتاعة الاطفال دى ... بس بردهالو برده )